PLASÊ, BOMBO.

Ops! Dopo tant fevelâ dai Gnognosaurs, si sin inacuarts che no ju vin ancjemò presentâts. Scomencìn cun Bombo, alore!

Come che si pues viodi da lis dimensions, Bombo al è il plui golôs dal grup. Al è un brontosaur, e in efiet al bruntule simpri, parcè che al à simpri fam. Par fortune il so cûr al è grant scuasit tant che il so stomi: cui che al cjate Bombo, al cjate propite un grant amî. In ducj i sens.

PLASÊ, MARTIN.

Martin al è un dai doi protagoniscj principâi dai Gnognosaurs, e sigûr no lu è deventât parcè che al è plui svelt di chei altris. Semplicementri lui e Momo a son simpri tai pîts cuant che al sucêt alc. Simpri daûr a lamentâsi par chel cuar che al à su la muse, al è stât lui a fâ cognossi e deventâ amîs ducj i Gnognosaurs. Ma chê chi e je une altre storie (e se no le cognossês, le podês cjatâ sul libri).

PLASÊ, MOMO.

Insiemit cun Martin, Momo al è il protagonist dai Gnognosaurs, ma no stait a dîjal che si monte il cjâf. Momo si crôt biel e svelt, ancje se, nol covente dîlu, nol à mai dimostrât di jessi ni un ni chel altri. Al è l'unic dai Gnognosaur che al à une morose, Cicci, ancje se lui al preferìs scuasit simpri lâ ator cun Martin. Ah, chês trê pontis che al à sul cjâf no son un cjapiel, a son propit il so cjâf. E no: no coventin a fâlu deventâ plui inteligjent.

PLASÊ, CICCI.

Cicci e je la morose di Momo. Come che si viôt da la foto, e je une buine fantate, che no si rabie mai. Ben, disìn scuasit mai. Come dutis lis feminis, Cicci e volarès simpri vê dutis lis atenzions di Momo. E Momo, come ducj i oms, al fasarès dut mancul che dajes. Ma si vuelin ben. No vin ancjemò capît ben parcè, ma si vuelin ben.

PLASÊ, RUGNE.

Se al rive Rugne, scjampait ducj! Rugne al è un tiranosaur, duncje al è carnivar, duncje se us ven dongje nol è par cirî compagnie, ma par cirî di gustâ. Dut câs, nol è pericolôs come che al somee, parcè che, gnogno come che al è, ancje a lui no i va mai drete une, e al finìs simpri cul stomi vueit.

PLASÊ, AGNUL E ICARO WRIGHT.

I fradis Agnul e Icaro Wright a son pterodatii, duncje a svolin. E no fasin nuie altri dut il timp. Cul fat che a san svolâ, a puedin lâ ator plui facilmentri e viodi plui lontan di chei altris. E ce che si bulin! Va ben: lassìnju gjoldi par chêst vantaç: tant no puedin sigûr svantâsi par la lôr inteligjence.

PLASÊ, MAMY.

Come che si capìs dal non, Mamy e je une mari. E come dutis lis maris, e sta simpri daûr dai siei fîs, simpri atente a ce che a fasin e a cemût che si sintin. Ce isal di strani? Che i siei fîs a son ancjemò ûfs. Ma je e somee no inacuarzisi. Cûr di mari nol sint resons.

PLASÊ, PROF. EINSAUR.

Il prof. Einsaur al è il sienziât dai Gnognosaurs. Forsit al sarès miôr dî che al volarès jessi sienziât, parcè che naturalmentri nol è mai rivât a inventâ o a scuvierzi nuie che al coventi a alc. Al fevele cuntune pronunzie un pôc todescje, metint ca e là i siei "ja" e "nein", e cuant che al fâs cussì i Gnognosaurs a stan cidins e i ubidissin. Tant, di ce che al dîs, no capissin nuie.

PLASÊ, BLIK.

Piçul ma volenterôs, Blik al è il aiutant dal professôr Einsaur. Di lui no savin masse, parcè che al è un di pocjis peraulis, anzit di une sole: "blik". Strani ma vêr, al è l'unic gnognosaur dotât di inteligjence. Ma jessint che nol rive a fevelâ, nissun lu scuvierzarà mai.

PLASÊ, JURASSIC CASELLA.

Covential un incjantesim? Une magjie? Un striament? No stait a clamâ Jurassic Casella par nissune reson al mont: al fasarès nome dams. Cuant che al à di fâ sparî une robe, sta sigûr che le moltipliche, e chel puar cunin che si puarte ator dentri dal cjapiel cuissà ce bestie che al jere prime di cognossilu. Par comedâ ducj i pastiei che al cumbine, al coventarès pardabon un mâc.

PLASÊ, TENENT BRONTSON.

Cui che à bielzà let il libri «I Gnognosaurs 2» al à cognossût un gnûf personaç, plui gnogno che mai. Cumò e je ore di presentâlu a ducj: ve chi il Tenent Brontson.

Cemût si fasial a difindi la leç cuant che la leç e à ancjemò di jessi inventade? Nol è un problem, par il tenent Brontson: tant, gnogno come che al è, nol cumbinares nuie istes. Cuant che tal jurassic e sucêt une robarie, un crimin o alc dal gjenar, al è lui a jessi clamât par cjatâ il colpevul. Ma naturalmentri cualsisei misteri al è masse dificil di risolvi, par lui. Fin cumò nol à cjatât ancjemò nancje un indizi da la presence di un çurviel tal so cjâf.

PLASÊ, JACK O'ROBY.

Si clame Jack, e il so mistîr (se cussì si pues clamâlu) al è bielzà scrit tal so nom: di fat, par vivi, Jack al robe. L’ultim personaç rivât tal mont dai Gnognosaurs al è un brontosaur, ma soredut un lari. Un che nol si ferme devant di nuie: al è bon di robâ il tacuin ancje al poliziot che lu sta percuisint! Pecjât che, cuntune panze cussì, e sedi dure platâsi, dopo di vê robât. Miôr cirî di confusionâ la polizie profitant da la incredibile someance cun Bombo. Ma chê chi e je une altre storie (e se o volês leile, la cjatais sul gnûf gnognolibri: “I Gnognosaurs 2”).

PLASÊ, PTEROSLAVSKIJ

Us varàn contât che il cine lu an inventât i francês, e che il pari dal plui impuartant metodi par recitâ al jere un rus. Dut sbaliât: prime di lôr, tal jurassic, al jere il mestri Pteroslavskij, il regjist plui famôs de preistorie.

Presuntuôs tant che nome un grant regjist al pues jessi, inacessibil tant che nome une vere star e pues jessi, ma soredut dordel come nome un Gnognosaur al pues jessi, Pteroslavskij al sta al cine come Einstein a la piture: no centre nuie.

Saraial forsit par chel che nissun al à mai sintût nomenâ il cine jurassic?

Ma chê chi e je une altre storie (e se o volês leile, la cjatais sul gnûf gnognolibri: «Gnognowood»).

PLASÊ, CIRO

 E l’Oscar par il miôr atôr no protagonist al va a... Ciro! Caraterist une vore dutil, adat a dutis lis parts e ducj i personagjos, al è stât scriturât par fâ la comparse in ducj i libris dai Gnognosaurs, a scomencâ di «Gnognowood».

Ciro, di fat, al ven fûr tes pagjinis dal libri DOME UNE VOLTE. Il zûc al è cjatâ fûr dulà che al è.

PLASÊ, INES.

E chê chi e je Ines, la vedrane dai Gnognosaurs. E no si fas fadie a crodi che e sedi di bessole, brute come che e je. Ma jê no si rint, e e continue a cori daûr a ducj i gnognosaurs che e cjate. E plui jê ur cor daûr, plui chei a scjampin. Rivaraie mai a cjatâ cualchidun?

GNOGNOVUIDE...

par permetius di orientâsi tal Gnognomont.
per permettervi di orientarvi nel Gnognomondo.

Ve ca ducj i personaçs cu lis lôrs carataristichis
Ecco tutti i personaggi con le loro caratteristiche

Achi dutis lis strichis e storie «Al rive il libri» jessude su «I Gnognosaurs 2!»
Qui tutte le strisce della storia «Arriva il libro» uscita su «I Gnognosaurs 2!»

I Gnognogadget, dulà che a son salveschermis, iconis e v. i. che o podês doprâ sul vuestri computer
I Gnognogadget, dove ci sono salvaschermi, icone etc. etc. che potete usare sul vostro computer

I Gnognozûcs discjamabii par zuiâ cui Gnognosaurs
I Gnognogiochi scaricabili, per giocare con i Gnognosaurs

Cui sono i Gnognosaur e cui isal l'autôr Dree Venier
Chi sono i Gnognosaurs e il loro autore Andrea "Dree" Venier

Cliccate sui i link seguenti per approfondire o per scoprire i gnognolibri: l'albo da colorare «Ciak! Si colore cun Gnognowood», i libri «I Gnognosaurs», «I Gnognosaurs 2», «Gnognowood» (da cui è tratto il nuovo albo), la traduzione in sardo del primo libro (la prima traduzione diretta dal friulano al sardo) «Is Gnognosaurs», l'albo da colorare «Gnognocolôrs/Gnognocolors» e il booktrailer di «Gnognowood» fatto assieme agli amici di Felici ma Furlans.