19.9.14

Il gnûf libri Gnognosaurs in alegât cul Messaggero Veneto, fra une setemane!!

Mandi a ducj i gnognofan!
Us scrivìn chest post par dâus in ateprime la notizie che vinars ai 26 di Setembar, Zornade Europeane des Lenghis, o podarês cjatâ in edicule, in zonte cul Messaggero Veneto, il gnûf libri dai Gnognosaurs:
«The Best(iis)»

Cheste la notizie in struc, chel ch’o cjatais sot al è par contaus alcaltri dal progjet: o vin gust di condividi alc di chel che al à dentri, duncje robe par gnognoapasionâts.

PRESIT E DIFUSION Il presit al sarà di 6,80 euro plui chel dal gjornâl e il libri al sarà dât fûr par dut il teritori des tre provincis furlanis (Gorizia, Pordenone, Udine). Lis copiis non sono tantis e us conseìn di prenotâ subit il libri li dal vuestri edicolant: propit par chest vin decidût di anticipaus la notizie, prime che vegni fûr sul Messaggero Veneto.
CONTIGNÛTS Il volump al met dongje tre des storiis plui bielis (o miôr: chês che stavin ben insiemit: DUTIS lis gnognostoriis a son bielis), une par libri jessût fin cumò. La prime, dal prin cumò esaurît, e je «Lis Origjins» che e sta vignint fûr a pontadis sul Messaggero Veneto che si sieraràn in setemane; sul libri a son tantis strichis in plui, che sul cuotidian no si rivave a metilis dutis. La seconde e je «A Vore», dal tierç libri «Gnognowood», e la tierce si intitule «Lis Vacancis», robe dal segont gnognovolump.
Ancje par chei che a vessin un o plui libris di chei passâts al è un libri di vêlu: dutis lis storiis  a son stadis tornadis a colorâ di plante fûr, corezudis li che coventave e mioradis un trop di strichis.
LA PREFAZION Un dai orgois di chest libri e je la prefazion di Manuele Fior. Nassût intal 1975 a Cesene, ma di gjenitôrs furlans (anzit cjargnei) al è illustradôr e fumettist. Pluri premiât, intal 2011 al à vinçût il premi"Fauve d'Or" al festival di Angoulême in Francie, tant a dî l'Oscar dai fumuts. Nus à fat l'onôr di introdusi il volump cuntune descrizion dai nestris gnognoerois plene di snait.
CEMÛT LEI Al inizia dal libri a son tre pagjinis ilustradis che a spieghin cemût lei la grafie furlane, un imprest util par cui che al si svissine pes primis voltis ae lenghe scrite o par chei che a an gust di savênt di plui.
EDITÔR E COLLABORAZIONS L’editôr al è il mesîl La Patriedal Friûl, il sfuei storic fûr par fûr in lenghe furlane dai 1946. L'editing (corezions, lessic, omogjeneitât) nol è mai stât curât cussì ben in gracie de precise e apassionade colaborazion de dotoresse Linda Picco che è à viodût de revision. Un grazie ancje al grafic Alex Olivetto pe grande professionalitât e dedizion ae cause. La stampe le à curade la Lito Immagine di Rodean dal Alt, che aromai plui che un fornidôr si è concuistade il non di «la gnognotipografie»: chest al è il cuart libri ch'o fasìn insiemit, aromai a son dai amîs, e no son gnognos par nuie! Un grazie ancje al Messaggero Veneto e al diretôr Omar Monestier chei à crodût a fuart intal progjet. Il volump al è stât metût su in gracie dal contribût de ARLeF (Agjenzie Regjonâl pe Lenghe Furlane) che lu à sostignût cuntun finanziament.