21.9.10

GNOGNOALBO DA COLORARE: L'ARTICOLO SU «La Vita Cattolica»

Ve ca il toc sul gnûf librut di colorâ dai gnognos jessût su «La vita Cattolica» di sabide
Ecco il pezzo sul nuovo albo uscito sabato sul settimanale «La Vita Cattolica»


Gnognosaurs di colorâ

Ator dai disens a corin dôs frasutis, une par furlan e une par inglês, che si puedin lei, intant che si colore, di cualsisei bande che si meti il librut

I fans dai Gnognosaurs che a spicin lis orelis!
Daspò il sucès dal libri cu lis lôr storiis, jessût tal mês di Dicembar dal an passât, cumò al rive un albut bilengâl, par furlan e par inglês, di colorâ, che al à par protagoniscj propit i dinosauruts nassûts tal 1996 dal lapis dal ilustradôr Dree Venier. Doprâts par calendaris e poster promozionâi par pandi l’ûs de marilenghe, lis aventuris dai Gnognosaurs a vegnin fûr regolarmentri su «Alc&Cè», la riviste par fruts dute in lenghe, suplement dal setemanâl «la Vite Catoliche».
L’albo «Gnognocolôrs/Gnognocolors», indreçât ai fruts, al sarà presentât domenie ai 26 di Setembar, aes 4 e mieze dopomisdì, li dal festival di fumets plui impuartant de regjon «Fiumettopoli», che si davuelzarà a Flum Venit ai 18, ai 19, ai 25 e ai 26 di Setembar.
Pardabon une biele vetrine pal gnûf progjet inventât di Dree Venier par «l’Omino Rosso» di Pordenon, la cjase editore che e à dât fûr il prin libri dai Gnognosaurs.
L’albo, in cumierç dopo de sô presentazion al festival, al è di 16 pagjinis cun 12 taulis dutis di colorâ. «Chei di "Fiumettopoli" a volevin vê par fuarce i Gnognosaurs ae lôr manifestazion e cussì o ai pensât di domandâ a Dree une robe semplice, un albo di colorâ cun pôc test e lui mi à puartât un prodot pardabon inovatîf che mi à scaturît e lassât entusiast», al dîs Orazio Cantiello, il titolâr di «l’Omino Rosso».
Il progjet, di fat, al è particolâr: il librut, cuviertute comprendude, al pues jessi voltât e zirât cemût che si à voie: i disens a puedin jessi gjoldûts, e piturâts, compagn; nol esist une base o un insom.
Ator di lôr a corin dôs frasutis, une par furlan e une par inglês, che si puedin lei intant che si colore di cualsisei bande che si decît di meti il librut. Un progjet grafic che al fâs vignî iniment ciertis creazions par fruts di Bruno Munari. Se no vês capît la descrizion, cjalait lis imagjinis parsore che a mostrin la cuviertute e une pagjine dal dentri e voltait il gjornâl di 180°: o capirês di ce che si fevele.
Metint dongje dôs lenghis «si da dignitât a dutis e dôs e il frut lis pues preseâ compagnis», al marche l’autôr, Dree Venier. La idee «le podeve vê nome une persone bilengâl, jo lu soi par furlan e par talian».
Parcè alore la sielte di meti dongje furlan e inglês? «Parcè che a son i nestris marcjâts di riferiment – al rispuint Venier –: il furlan pal Friûl e o pontarìn ai Usa cul inglês: "l’Omino Rosso" al à vierzût une sede in Americhe, lis traduzions par inglês nus son rivadis propit di là».
Te suaze des mostris di «Fiumettopoli», si podaran viodi ancje taulis ineditis dai Gnognosaurs, dongje di chês di Tex e Topolino. Po, a saran il marcjât dai fumets, animazions, concierts e incuintris cui autôrs. A saran presints il gurizan Andrea Castellan, cognossût cul non di «Casty», disegnadôr e senegjatôr di Cattivik e cumò de Disney, vincidôr tal 2006 dal Premi «Fumo di china» tant che miôr senegjatôr umoristic talian. Po dopo il disegnadôr di Tex, Andrea Venturi, e par finî Claudio Nizzi, un dai plui innomenâts senegjatôrs talians che dopo vê creât tancj personaçs par «Il Giornalino» tant che Larry Yuma, Capitan Erik, Piccolo Dente, Nicoletta, cumò al lavore par Tex.
Lis iniziativis editoriâls cun protagoniscj Martin, Momo, Bombo e dute la compagnie dai dinosauruts furlans a van indevant, duncje, dopo la jessude dal libri «I Gnognosaurs!» ae fin dal an passât: un sucès in librarie. «De prime edizion a son aromai restadis pocjis copiis che i librârs no nus tornin indaûr par contentâ i lôr clients che lu domandin ancjemò – al conte Orazio Cantiello –. E o sin daûr a lavorâ parcè che la aspetative dai tancj Gnognofans pal futûr no resti deludude». In sumis, nol larà vie tant par podê tornâ a lei lis aventuris di chescj piçui erois dal Jurassic che a fevelin par furlan, protagoniscj di une schirie di gags spiritosis e sureâls.