Ai 3 di Avrîl, dut il Friûl al fiestezarà i 934 agns de Patrie dal Friûl. Ma sino sigûrs che la datazion e sedi chê juste? Tai ultins timps, cualchi studiôs al à cjatât segns inecuivocabii che a spostaressin il "complean" dal Friûl di cualchi an: 150 milions di agns, pe precision. Par cjatâ la prime testemoneance di un popul che si esprimeve in marilenghe bisugne di fat lâ indaûr fin ai 3 di Avrîl dal 150.000.934 prin di Crist, in Ete Jurassiche.E propit a chest popul, i Gnognosaurs, e je dedicade la mostre che si scree domenie ai 3 di Avrîl a Glemone: "La Gnognomostre".
Nassûts intal 1996 dal lapis spiçot dal ilustradôr Andrea "Dree" Venier, lis strichis a fumuts dai dinosauruts "Gnognosaurs" di in chê volte a compagnin i fruts furlans ae discuvierte de marilenghe, sedi su la pagjine de riviste par fruts “Alc&Cè” che tai libris jessûts tai ultins doi agns: "I Gnognosaurs" e "I Gnognosaurs 2".
Aes 17,30, li dal Museu Civic in vie Bini, cu la presince dal autôr Andrea "Dree" Venier e dal editôr dai libris dai Gnognosaurs Orazio Cantiello (ed. Omino Rosso), si vierzarà la esposizion cu lis taulis origjinâls dai fumuts, i libris, i Gnognoboi, si podarà fâsi la foto cui Gnognosaurs e tant altri. L'autôr Dree Venier al sarà disponibil vie par dute la presentazion par fâ disegns di dediche a cui che al à il libri.
